(ខេត្តកែប)៖ទីតាំងល្បែងសង្វៀនបញ្ជល់មាន់និងអាប៉ោងមួយកន្លែងដុះស្លែជាយូរមកហើយហេតុអ្វីមិនមានសមត្ថកិច្ចណាហ៊ានបង្រ្កាបយ៉ាងដូច្នេះ ប្រជាពលរដ្ឋដែលរស់នៅជិតនោះដាក់ការសង្ស័យថាប្រហែលជាឆ្នាំងបាយរបស់សមត្ថកិច្ចហើយមើើលទៅបានលោកមេប៉ុស្តិ៍ឬអធិការមិនបង្ក្រាប ឬ មួយ លោកទ្រី ដែលគេដឹងថាជាម្ចាស់សង្វៀនជល់មាន់និងអាប៉ោងនេះមានបារមីធំជាងអធិការស្រុកទៀតទេដឹង។
បច្ចុប្បន្ននេះមានមហាជនជាច្រើនកំពុងតែឆ្ងល់ថា តើហេតុអ្វី?បានជាលោកកែន សត្ថា អភិបាលខេត្តកែប និងលោកបែន តារា ស្នងការខេត្តកែប មិនហ៊ានបង្ក្រាបសង្វៀនជល់មាន់ អាប៉ោង និងយូគី ដែលមានទីតាំងនៅចំណុចចំការស្វាយជាប់ផ្លូវរទេះភ្លើង ស្ថិតក្នុងភូមិចំការដូង ឃុំ.ស្រុកដំណាក់ចង្អើ ខេត្តកែប មួយនេះសោះតើមានមូលហេតុអ្វី ? ហើយនៅបច្ចុប្បន្ននេះកំពុងបើកលេងយ៉ាងរលូន។
បើយោងតាមប្រភពបានរាយការណ៍ឲ្យដឹងថា ក្នុងមួយថ្ងៃៗបើនិយាយពីម៉ូតូដែលអ្នកញៀនល្បែងចូលទៅលេងមិនក្រោម៣០០.ទៅ៣៥០ គ្រឿង ហើយបើរថយន្ដវិញមិនក្រោម៨០គ្រឿងនោះទេ សុទ្ធតែរថយន្ដស៊េរីទំនើបៗ ។
ហើយពលរដ្ឋដែលរស់នៅជិតទីកន្លែងសង្វៀនជល់មាន់ អាប៉ោង និងយូគីមួយនេះបានឲ្យដឹងថា រាល់ថ្ងៃមានអ្នកញៀនល្បែងរាប់រយនាក់ជិះម៉ូតូ រថយន្ដ ចូលទៅលេងសប្បាយហ៊ោកញ្ជ្រៀវលាន់រំពង(អ្នកឈ្នះមុខខ្លាញ់ អ្នកចាញ់មុខសេះ)។
ហើយពលរដ្ឋបានបន្តទៀតថា ម្ចាស់បនល្បែងខាងលើមួយនេះជាអ្នកមានអំណាចនៅក្នុងខេត្តកែប អញ្ចឹងហើយបានជាខាងអាជ្ញាធរ សមត្តកិច្ចជំនាញខេត្តកែបមិនចុះបង្ក្រាប។
សូមបញ្ចាក់ថា ក្នុងការភ្នាល់មាន់ជល់ អាប៉ោង និងយូគីចាញ់ឈ្នះលុយរាប់រយ រាប់ពាន់ រាប់មឺុនដុល្លាឯណោះ។
ដូច្នេះពលរដ្ឋក៍ដូចជាមហាជន សូមអំពាវនាវនិងស្នើសុំដល់ សម្ដេចក្រឡាហោម ស ខេង ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ និងឯកឧត្ដម នេត សាវឿន អគ្គស្នងការនគរបាលជាតិ មេត្តាមើលមន្ត្រីអាជ្ញាធរសមត្ថកិច្ចខេត្តកែបផង មូលហេតុអ្វីបានជាមិនហ៊ានបង្ក្រាបល្បែងសុីសងមួយខាងលើនេះសោះប្រហែលមានមូលហេតុអ្វីហើយមើលទៅ ?៕
