(ភ្នំពេញ) ៖ ប្រធានក្លឹបអ្នកកាសែតកម្ពុជា បង្ហាញក្ដីបារម្មណ៍ ចំពោះការរីកចម្រើន នៃអ្នករាយការណ៍ពត៌មានតាមអនឡាញ ដែលធ្វើឲ្យប៉ះពាល់ដល់ជនរងគ្រោះ ជាពិសេសសិទ្ធិនៃការផ្ដល់ពត៌មាន និងការបង្ហាញរូបរាងកាយរបស់បុគ្គលសាម៉ី។
ថ្លែងប្រាប់អ្នកសារព័ត៌មាន ក្រោយប្រកាសបើកវគ្គបណ្ដុះបណ្ដាលសារព័ត៌មាន ស្ដីពីគុណភាពនៃសេចក្ដីរាយការណ៍តាម អនឡាញ និងផ្សាយបន្តផ្ទាល់ នៅព្រឹកថ្ងៃទី២៨ មិថុនានេះ នៅហាង ប៊ុក កាហ្វេ លោកប៉ែន បូណា បានបញ្ជាក់ផងដែរថា ការដែលផ្សព្វផ្សាយព័ត៌មាន តាមរយៈប្រព័ន្ធអនឡាញ ដោយមិនបានគោរពតាមក្រមសីលធម៌វិជ្ជាជីវៈអ្នកសារព័ត៌មានឲ្យត្រឹមត្រូវនោះ គឺធ្វើឲ្យបាត់បង់នូវជំនឿទុកចិត្ត របស់បងប្អូនប្រជាពលរដ្ឋ ក្នុងការទទួលបានព័ត៌មានពិត ច្បាស់លាស់ ឥតលម្អៀង និងមានក្រមសីលធម៌វិជ្ជាជីវៈត្រឹមត្រូវ ដោយមិនរំលោភបំពានសិទ្ធិអ្នកដទៃ។
លោក ប៉ែន បូណា ប្រធានក្លឹបអ្នកកាសែតកម្ពុជា បានបង្ហាញក្ដីបារម្មណ៍ ចំពោះការរីកដុះដាល នៃក្រុមអ្នករាយការណ៍ព័ត៌មានតាមអនឡាញ ឬក៏តាមបណ្ដាញទំនាក់ទំនងសង្គមហ្វេសបុក មួយចំនួន ដែលមិនទាន់បានយល់ជ្រៀបច្បាស់ នៃក្រុមសីលធម៌នៃអាជីពអ្នកសារព័ត៌មាន ដែលផ្សាយព័ត៌មានជូនប្រជាពលរដ្ឋ ទាំងមិនមានភាពច្បាស់លាស់ គ្មានប្រភពត្រឹមត្រូវ មិនគោរពសិទ្ធិបុគ្គល ការថតរូបរាងកាយទាំងមិនមានការអនុញ្ញាត និងការប្រើពាក្យពេចន៍មិនសមរម្យជាដើម៕
