(ខេត្តតាកែវ) ៖ ពលរដ្ឋរស់នៅស្រុកព្រៃកប្បាសបានរិះគន់ថា ក្រុមហ៊ុនអមតៈ ដែលជា ក្រុមហ៊ុន ស្ថាបនាផ្លូវកៅស៊ូមួយខ្សែរប្រវែងជាង១៥គីឡូម៉ែត្រពីចំណុចផ្សាសៃវ៉ាទៅដល់ផ្សារជ្រែដោយឆ្លងកាត់ឃុំចំនួន៣ គឺឃុំព្រៃផ្តៅ ឃុំកំពែង និងឃុំអង្កាញ់ ដោយផ្ដើមធ្វើ កាលពីឆ្នាំ២០១៩នោះ រហូតមកដល់ពេលនេះបានខ្ទេចទាំងស្រុងហើយ។
ពលរដ្ឋថា មុនពេលក្រុមហ៊ុនអមតៈស្ថាបនាផ្លូវនេះ វាមិនពិបាកធ្វើដំណើរប៉ុន្មាននោះទេ តែដល់ពេលក្រុមហ៊ុននេះស្ថាបនារួចរាល់ស្រួលធ្វើដំណើរខ្លាំងណាស់ តែមិនបានមួយឆ្នាំផងនោះ ផ្លូវនេះត្រូវ ខ្ទេច ខ្ទីដោយ ពិបាកធ្វើដំណើរលើសដើម។
ពលរដ្ឋបន្តថា ថវិការជាតិជាច្រើនរយលានរៀលត្រូវបានយកមកចាយខ្ចះខ្ចាយជាមួយក្រុមហ៊ុនខាងលើ ព្រោះតែក្រុមហ៊ុនមួយនេះធ្វើផ្លូវមិនមានគុណភាពហើយវេចខ្ចប់លុយទៅបាត់ ដោយ ទុកឲ្យ ពលរដ្ឋវេទនាក្នុងការធ្វើដំណើរឆ្លងកាត់ផ្លូវនេះដដែល។
ពាក់ពន្ធ័ករណីខាងលើនេះ លោក មុត តូ មេឃុំព្រៃផ្តៅបានថ្លែងថា ផ្លូវមួយខ្សែនេះខាងខេត្តជាអ្នកធ្វើ តែឥឡូវខូចខ្ទេចខ្ទីអស់ហើយ ។ ដោយ មើល ឃើញថា ពលរដ្ឋពិបាកធ្វើដំណើរពេក លោកបានទិញថ្មយកមកចាក់ជាង ២០ឡាន តែដោយសារសភាពផ្លូវខូចខ្លាំងពេកទប់មិនជាប់នោះទេ គឺនៅបន្តខូចដដែរ។
ចំណែកលោក សុិន ញិល មេឃុំកំពែងបានថ្លែងថា ផ្លូវកៅស៊ូនេះស្ថាបនានៅឆ្នាំ២០១៩ តែមិនបាន១ឆ្នាំផងខូចវិញអស់ហើយ។ លោកមេឃុំបញ្ជាក់ថា ការខូចផ្លូវនេះមិនមែនមកពីឡានដឹកធ្ងន់ទេ គឺមកពីគុណភាពផ្លូវធ្វើមិនជាប់តាមស្ដង់ដា។
នៅថ្ងៃនេះយើងមិនអាចសុំការបំភ្លឺពីក្រុមហ៊ុនអមតៈដែរជាក្រុមហ៊ុនទទួលម៉ៅការស្ថាបនាផ្លូវនេះបានទេ។ យ៉ាងណាក៏ដោយប្រជាពលរដ្ឋបានស្នើដល់លោក អ៊ូច ភា អភិបាលខេត្តតាកែវ សូម មេត្តាជួយចុះមកមើលផ្លូវមួយខ្សែរនេះផង៕